మహావృక్షం ఎండిపోయింది
పిచ్చి కాకొకటి గూడు కడుతుంది
ఆశలను నోట్లో పెట్టుకుని ..
ఆశయాల గడ్డి పూసలతో ..
సందెపొద్దులో సూరీడు ఎర్రబడ్డాడు
ముసలిదొకత్తె సిద్ధమయ్యింది
ఆ సెగకు రొట్టెలు కాల్చడానికి
ఆకలి దుప్పటి కప్పుకుని ..
కన్నీటితొ పిండిని తడిపి...
జోరువానకు అడవి తడిసి ముద్దైపోయింది
పిచ్చివాడొకడు చెట్టుకిందకు చేరుతున్నాడు
ఎముకల గూడును కప్పడానికి
చిరిగిన తుండును చేతిలోకి తీసుకుని ..
కసాయొకడు కత్తి నూరుతున్నడు
దూడ ఆవు పొదుగును చేరాలనుకుంది
తల్లి పాలను తాగాలని ..
రేపటికింకా మిగుల్చుకుని ...
సంబరాలు జరిగిపోతున్నయ్
పిచ్చి ప్రేమికుడొకడు సిద్ధమౌతున్నడు
పట్టు బట్టలతో, పసుపు పారాణితో
మరు జన్మలో లగ్గానికి ....
No comments:
Post a Comment